unknown

الاول خلينا نبقى متفقين ان مش شرط يكون فيه عنوان او اسم للبوست وممكن كل واحد يسميه حسب فهمه للموضوع........

انا بس مستغربة هيا حالة الضياع اللى الشباب بقى فيها دى من ايه بالظبط برغم ان كتير من الشباب دول مش عندهم بطالة ولا حتى صيع سورى يعنى... لا بالعكس دول معاهم شهادات جامعية زى الفل وكمان بيشتغلوا فى وظائف ممكن نقول عليها الى حد ما انها بتحقق اللى هما عايزينه

ودة كله كوم واللبس الشياكة اللى احنا بقينا بنلبسه اليومين دول دة كوم تانى ؟ حاجات غربية اوى بقيت تعجبنا الذوق بقى غريب اوى يعنى كل ما اللى انتا لابسه مقطع ومبهدل كل ماكان غالى واشيك وتكون ساعتها شاب استايل ولبسك كله من الماركات الجامدة. طبعا انا مش عايزة اتكلم على البوكسر الجامد بتاع اليومين دول ومش عايزة احكى فى الحوار دة عشان فى زميلة لينا فى البلوج اتكلمت عنه بأستفاضة بس بجد ارحمونا شوية من الاشكال الكرتونية يعنى كفاية ميكى ماوس وبطوط والحاجات دى خليكوا شوية نجوم، وقطط، وكلاب يعنى نرغب فى التنوع وبالنسبة للجيل يعنى كفاية الشباب كلها بقيت متكهربة ليه العذاب دة بس بقيتوا كلكلوا شبه سيفن أب؟

دى حاجة اما بقى بالنسبة للبنات بقى فهما مش محتاجين يلبسوا ميكى ولا حاجة عشان البنات شعارها كل( ماتخففى هدومك كل ماتتعاكسى اكتر )كل ما اللبس يكون قصير وشفاف وضيق أأأوى كل ماكانت بت استايل وماشية مع الموضة بتاعة لبنان مع ان والله والله مابنبقى مرتاحين فى اللبس دة داحنا بنكون شافطين وعاملين عمايل عشان نعرف نلبس اللبس الشياكة دة.................................

طيب دى بردة مشكلة من المشكلات معلشى استحملوا اصلهم كتير؟

ودى بقى اكتر حاجة بتواجهنا وهيا ان احنا دلوقتى بنعانى من نقص الرجالة طيب كدة وقلنا ماشى لكن لما يكون الباقى كمان مينفعش وغير قابل لتحمل المسئولية يبقى كتير كتير والله?

هقولكوا مثلا على حاجة حصلتلى شخصيا كتير وانا بكون راجعة مثلا من الشغل او رايحة اى مكان يكون قاعد جنبى او قدامى حتة ولد شيك واستايل وحلو كمان وافضل افكر هو ممكن يكون فى حاجة تحصل بينا او ياخد باله منى وبعد كدة تيجى الصاعقة ويبتدى يتكلم مع حد من اصحابه ولاقى بعيد عنكوا واحد عبيط اهبل ?

بيتكلم فى مواضيع تافهة لا وكمان كل مشاريعه المستقبلية انه يظبط دى ويعرف دى؟ طيب والنبى دلوقتى احنا ممكن نفتح بيت ازاى اذا كان كل طموحه فى الحياه انه يجلجل شعره زى فلان ويسقط بنطلونه زى علان حاجة مش طبيعية ؟

كل اللى اقدر اقوله فى الاخر (هو ربنا يشفى وياحول الله يارب)

HARD TIMES

اوقات صعبة كتير بتيجى على الواحد مع انه ممكن ميكونش عنده اى مشاكل ولو قلنا عنده فراغ عاطفى بردة مفيش فراغ او ممكن نقول ان فى حد بيحبه بس انتا مش كدة يعنى مش بتحبه وكل مايحاول يقرب منك انتا تزهقه والمأساة بقى لو هو بقى بيحبك ومستحملك بس طيب وايه العمل مانتا بردة مش بتحبه .

غريب اوى اللى احنا فيه دة ليه دايما اللى انتا عايزه ميكونش ليك واللى عايزاك تكون مش ليه هيا حكمة ولا عشان الدنيا مبتديش حد اللى هو عايزه.

والا بقى لما تكون حاسس انك مضايق من كل الناس اللى انتا شايف معاهم الحاجة اللى نفسك تحصلك فعلا دى اوقات صعبة اوى ان الانسان يتحملها ممكن لو انتا برة الموضوع متحش بكلامى بس لو كنت جربته او كنت لسه فى نفس المرحلة دى يااااااه اكيد فعلا هتحس بالشعور دة اصل فى مثل قديم بيقول اللى ايده فى المياه مش زى اللى ايده فى النار بصراحة عنده حق اللى قال الكلام الجامد دة والله راجل اصلى.

طيب هو فى حل ولا هنقول كل واحد مش بياخد غير نصيبه اه طبعا انا موافقة بس المشكلة ان الانسان فى طبيعته مستعجل وكمان فى نوع من الشخصيات بتحب الحلول السريعة مع انها ممكن تكون حلول بس على المدى القصير دة كل عشان احنا مبنقدرش نستنى الحل اللى بيتاخر شويتين.

ماعلينا هو كدة فى مشاكل ملهاش حلول ولا تفهملها اى مبرارات بس هنعمل ايه ادينا بنشكى ونفضفض مع بعضينا ولا ايه ياجماعة؟

SPONSERED BY LAALAA

المشكلة دى بقى جامدة جدا قولولى ازاى بصوا ياجماعة ساعات البنات بيكونوا عايزين عكس اللى موجود زى ايه مثلا؟

مثلا واحد بيحب واحدة وهيا مش طايقاه مش عشان حاجة بس عشان هو اللى حبها الاول وساعات تانية تكون البت هتموت على الواد بس عشان منفضلها وبعيد عنكوا تفضل تعمل فى حورارات وتسئل دة وتاخد راى دة وتحاول تعرف ايه الحاجات اللى ممكن تشده ليها او تلفت نظره وفى الاخر النتيجة زفت اقولكوا ليه عشان ازاى انا افضل اجرى ورا واحد عشان احسسه بيا وفى الاخر اقول دة بيحبنى حتى بعد مايقولى انا بحبك؟ يكفى انى انا اللى لفت نظره وانه ماخدش باله لوحده وعلى فكرة الاحساس دة وحش جدا ياريت محدش يفكر يجربه.

SO BAD YA MAN

بصوا الموضوع كبير كبير اوى مش عارفة ابدؤا منين بالظبط بس المشكلة ان مفيش حد فاهم اى حاجة وكلوا عمال يشرح ويحلل لغيره ويعالج مشاكل غيره وهو مش عارف يعالج مشاكله اللى تخصه بص بردة مش هيا دى القضية المشكلة ان الواحد مبقاش عارف ايه الصح وايه الغلط مبقاش في معايير اصلا للغلط والصح وكله بيتعامل على اساس دماغه ويقول امشى ورا دماغى واشوف موديانى فين؟

(مشكلة شخصية)

انا مثلا واعوذ بالله من كلمة انا بحل مشاكل الناس وناس كتير تقولى انتى احسن حاجة فيكى دماغك واقعية وبتفكرى كويس والمهم انى انا اصلا والا بعرف افكر لنفسى ولا بعرف اشغل دماغى اصلا تفتكروا انا زى القرع يمد لبرة يعنى ممكن اكون بحل مشاكل الناس ومش عارفة انا ليه كدة المهم مش هطول عليكوا بس المهم انا حبيت اتكلم عن نفسى ومكلمش على مشاكل حد تانى عشان رايى كل واحد يخليه فى حاله

(الصداقة الصدوقة)

بالنسبة بقى للموضوع دة فدة حاجة كويسة جدا يعنى انا والحمدلله مش بعرف اعمل اى حاجة او اختار اى حاجة فى حياتى الا لما اخد راى حد واكون واثقة جدا من رايه مع انى ممكن ماخدش برايه بس بردة ساعات بحس انى عايزة مساندة متعرفوش دى عدم ثقة بالنفس ولا مرض بطال ولا ايه عشان كدة لازم الصداقة الصدوقة تكون موجودة.

تحديد المصير

دى بقى مشكلة ياجماعة وحلها سهل اوى يعنى اهالينا يقولوا او بعض الشباب كمان ان الجواز دة بيموت الحب ازاى ايجماعة وهو البداية وكل الللى فات دة كان كلام فاضى وان الجد ابتدى دلوقتى يبقى ازاى نهاية انا رايى ان كل واحد فى ايده يخلى حياته حلوة او منيلة بنيلة

سورى للتعبير بس هو دة الكلام اللى بيتقال يعنى مثلا لو الست عايزة تخلى جوزها يقعد هتعمل البدع عشان يقعد فى البيت وفى نفس الوقت لو عايزة تطفش جوزها بردة هتعمل البدع عشان يغور من البيت كفاية اوى انها بس تتعصب بالايشارب هى كدة ضمنت انه مش طايق يبص فى وشها .كمان الراجل لو عايز مراته تملى عينه كانت هتملى عينه حتى لو كانت لمؤاخذة شبه القرد يعنى الحل فى ايدهم ليه بقى بيصعبوها علينا قصدى يعنى على اللى لسه مدخلوش المرحلة دة ويعقدوهم فى عيشتهم ويخلوهم يكره الجواز واللى بيتجوزه بجد الناس دى غريبة تعمل العملة وتقول مش انا دة السبب فى الظروف والعيشة وهما والله مالهموش اى دعوة0